Foto: Folkemusikkarkivet

Musikarar:

• Øystein Sandbukt (gitar)
• Britt Elise Skram (fele)
• Thea Marie Ytterdal (fele)
• Kine Iselilja Gyldenskog (song)
• Frøydis Bergheim Ruud (fele)
• Bjørn Petter Tøsse (trekkspel)

Konsertar:

• 26. november: Surnadal kulturhus
• 27. november: Ørsta kulturhus
• 28. november: Sykkylven kulturhus
• 29. november: Molde kulturhus (det gamle, sør for Châteauet)

Inge Godtland var leiar for musikken, som var framifrå. Publikum humra og klappa. Og om nokon var i tvil: Alle er gode venner, både før, under og etter dansen!

Oppdatert 7.5.15

---

Aktuelt

Marte: Eit liv med dans

Folkemusikkarkivet (rull nedover til 27. august) har snakka med Marte Solem Trondsen, mangeårig BUL-dansar, og fått mykje informasjon som sikkert vil dukke opp sidan.

8.11.14

12. september: Dansetreff ved Trollstigen

Arvid Stennes i Rauma spelemannslag har sendt ut denne invitasjonen:

«Vi gjentar sukseen fra tidligere år og vil også denne høsten arrangere dansetreff på Trollstigen Gjestegård lørdag den 12. september. Opplegget blir som tidligere med flere lag som står for dansespillingen. Kanskje det også vil bli arrangert et kurs før dansen begynner i en eller annen danseform – noe som Rauma Leikarring vil ta seg av. Dette vil vi etterhvert komme tilbake til.

Vi ønsker alle lag hjertelig velkommen og håper dere kan komme og bidra til et hyggelig spel- og dansetreff. La meg gjerne få en tilbakemelding.

Ellers kommer vi tilbake med mere informasjon over ferien.»

Kontaktperson er , tel. 950 40 122.

Tilleggsopplysningar frå Arvid:

«Følgende lag har meldt seg på til dansespilling: Grendalaget, Dåm og Drag, Litt tå kvart (en gruppe med torader, trekkspill, gitar og bass), Valldal Spelemannslag, Rauma Spelemannslag, Bjarne og Ingar (lettere sjanger).

Det er kanskje også mulig at Rauma Leikarring vil benytte anledningen å arrangere et kurs før dansen, noe de har gjort på de tidligere tilstelningene.»

Siste: Dette kurset blir i Romsdalsspringar, ved Anna Gjendem. Bygdaliv får opplyst at det skal starte kl. 17.00. Pris kr 100 for kurset, 150 for dansekvelden.

Oppdatert 7.9.15

---

5. mai: Dansekveld i Isfjorden

Tysdag 5. mai kom Rauma Spelemannslag på øvinga til Rauma Leikarring, og Rauma inviterte BUL, Sylte-Malme og Lyngstad til å vere med.

Det er alltid godt å danse til Rauma Spelemannslag, så åtte dansarar tok turen gjennom open tunnel, på omveg om stengd tunnel og sjølvsagt ferje. Raumafolket stilte med omtrent like mange. Spelemennene starta denne gongen kl. 18.30 og heldt på til ca. 20.30. Dei spela runddansar, pols, springar og tango. Marit Bergheim gjorde runddansane til turdansar der det passa slik.

Bygdaliv har ingen bilete frå denne dansekvelden, men vi må ta med at Rauma varta opp med eit variert og sunt kveldsmat-bord.

Oppdatert 6.5.15

1965: Gammaldanskurs

I RB-spalta «For 50 år siden» 13. mars kunne vi finne notisen «Festlig avslutning av gammeldanskurs i BUL».

Kurset vart avslutta på ein fredag, som må ha vore 5. eller 12. mars 1965. Dei nærare 60 deltakarane hadde hatt voggene sine på ulike stader i landet, så det er rimeleg å tru at mange var innflyttarar til Molde. Sjølv om dei var omtala som «disse ungdommene», kan ikkje alle ha vore 15-16-åringar. Kanskje nokon som les Bygdaliv no, har lyst til å fortelje om kurset?

22.3.15

Folkemusikk på Youtube

Folkemusikkarkivet har lagt ut ein del videoar på Youtube. Her er nokre eksempel:

• «Hilsen til Ingjerd», reinlender av Olaf Overå, spela av Britt Elise Skram på konserten i Molde 25. februar 2015
• «Vengedalsvalsen» med Rauma Spelemannslag
• «Meita» med spelemannslaget Havella, frå Fylkeskappleiken 2014
• Masurka med Romsdal Spelemannslag, frå Fylkeskappleiken 2013

Oppdatert 9.4.15

28.2.15: Nordmøre og Romsdal er samla (litt)

Den siste dagen i februar vart også den siste for Nordmøre Ungdomslag og Romsdal Ungdomssamlag, som begge vart stifta i 1895. Etterpå vart det den første dagen for det nye Nordmøre og Romsdal Ungdomslag. Frå no av er det dette fylkeslaget BUL og andre lokallag i nordfylket er med i.

Samanslåinga har vore planlagt lenge, og har også vore omtala i Bygdaliv før (sjå 2014). Det var ingen spesiell dramatikk på desse årsmøta, men ein del diskusjon om namn og lov (vedtekter). I det nye fylkesstyret er både Nordmøre og Romsdal godt representerte. Anna Gjendem, som i grunnen har det travelt med mykje anna, tok på seg å vere med i styret i eitt år.

Fylkesårsmøtet etter samlinga. T.v.: Alf Steinar Nekstad, gjest frå NU. Den unge mannen i midten er fylkesleiar Oddgeir Løvold. (Foto: ein hotelltilsett.)

Oppdatert 3.3.15

31.1.15: Dansekveld i Stordal

I alt 12 frå nordsida og 7 frå Rauma stilte på dansekvelden i Stordal. Her i Bygdaliv kan vi berre skryte av (i kronologisk orden) middagen, Valldal spelemannslag, dansegolvet, songdansen, kaffien og kakene og turdansøkta med mange bytedansar. Det var utruleg mange gode dansarar på golvet. Dette er for tida det næraste vi kjem ein leikfest på våre kantar.

Oppdatert 2.2.15

11.12.14: Sandum/Kvernberg/Sandum konsert og dans

I grunnen er dette ei sak frå i fjor, men i Bygdaliv er ho like ny no. Øyvind Sandum fortel til Odd Arne Halaas om dei ulike musikkstilane, og vi får sjå opptak av dansen i Molde 19. november. Nokre vi kjenner, dukkar opp som linselus! Sjå Youtube.

4.1.15

---

29. april: Lajla og John Ole spela på Reknes

Bra med publikum også på den siste konserten i denne serien, men ikkje så mange som på dei andre. Konserten gjekk under radaren til Romsdals Budstikke. Kanskje det var fordi Lajla Renate Buer Storli og John Ole Morken er mindre kjende namn i Molde-området, og konserten var meir tradisjonell.

Likevel: dei som kom, fekk ei fin oppleving. Duoen spela drivande slåttar på fele og hardingfele, og Lajla song klokkeklårt stev og viser med gitarfølgje av John Ole. Dei avslutta med dette ein tre vekers turné på skular i distriktet, så mange born kjenner dei.

Nokre av borna spela sjølve. Ei barnegruppe frå Dåm og Drag i Tresfjord innleidde konserten saman med tre frå Molde Musikkskole, alt under leiing av Britt Elise Skram. Borna gjorde også nokre slåttar saman med dei vaksne. Anna Gjendem, som hadde teke initiativet til konserten, spela i nokre av slåttane.

Etter konsert og kaffipause spela duoen til dans, og folk kosa seg med runddans, pols, springar og rull.

Molde Fotballklubb spela heimekamp på same tida. Dei som likar både fotball og fele, måtte velje ein av delane. Slike «kollisjonar» har det vore få av, men det er vanskeleg å unngå dei heilt. Parkeringa gjekk greitt; husstyret sette ut bukkar for å reservere plassane rundt huset, og BUL-folk gjekk vakt.

Oppdatert 4.5.15

Førehandsomtale av konserten her i Bygdaliv

I serien av konsert- og dansekveldar på Reknes ungdomshus er det denne gongen Lajla Storli og John Ole Morken som kjem. Denne duoen er svært allsidig. Lajla spelar hardingfele og syng; John Ole spelar hardingfele, vanleg fele og gitar.

Begge to er godt forankra i sine tradisjonsdistrikt, Lajla frå Hardanger og John Ole frå Rørosdistriktet.

John Ole Morken er ein felespelar med eit sterkt og nært møte med sin eigen tradisjon. Han har gjennom mange år skapt seg ei stor oversikt på repertoaret frå Rørostraktene. Å finne attgløymde slåttar på notar, opptak eller frå levande kjelder, er noko han brenn sterkt for. Samstundes har han ein energisk og personleg formidling av musikken, der publikum lett vert rivne med av gode historiar og godt spel.

John Ole vart nominert til Spelemannspris for si fyrste plate i 2007. I 2012 medverka han i operaen «Den fjerde nattevakt» ved Den Norske Opera og Ballett. John Ole er ein mykje brukt pedagog ved Ole Bull Akademiet på Voss, og er ein populær pedagog ved kurs og seminar i folkemusikkmiljøet.

Kvedaren og hardingfelespelaren Lajla Renate Buer Storli er ei livsglad jente som ynskjer å skape god stemning med musikken. Ho har alltid følt ein stor trong til å dele tonar med seg, og fekk tidleg lære slåttar på hardingfele av spelemannen Knut Hamre. Lajla elskar å bruke stemma, og lærde seg folkesong i ungdomsåra med å lytte på plater og delta på nokre kurs i Hardanger. Musikken gir rom for både bevegelse og ettertanke, noko Lajla ynskjer å dele med sitt publikum.

I dag lever Lajla som frilansmusikar, og er mykje brukt som lærar ved Ole Bull-Akademiet på Voss. I 2013 kom hennar fyrste plate, «Møya som drøymde», som hausta gode kritikkar i aviser og blad.

I mange år har dei to spela saman. Dei har turnert i inn- og utland med eigne produksjonar og i regi av Rikskonsertane.

• Konsert kl. 19.00, dans kl. 20.00, slutt kl. 21.30
• Spelemannslaget Dåm og Drag startar konserten med nokre slåttar
• Pris: 200 kr, born 50 kr
• Kake og kaffi inkludert i prisen
• Arrangør: MoldeFOLK i samarbeid med BUL Molde
• Set gjerne opp denne plakaten der du ferdast
• Også omtala på Facebook

Tekst: Anna Gjendem og Lars Staurset - oppdatert 28.4.15

---

Majorstuen på Vonheim

Det vart ein forrykande konsert på mange strengar, om vi kan seie det slik. Utanom dei levande fuglane fekk dodoen representere dei utdøydde, og nikkersfuglen barnefantasiane. Resten var vaksenfantasiar over høgst levande fuglar som lunde, gauk, dompap og svane.

Bygdaliv-red. kan svært lite om fuglekvitter, og er heller ingen ekspert på musikk, men det var spennande å lytte og sjå. Kjøp gjerne den nye CD-en, men det er endå betre å oppleve gruppa i konsert. Elles får vi vise til omtalen i Romsdals Budstikke 22. april, der Ole Foss gav terningkast 6. Same avis hadde også eit intervju med Jorun 14. april.

Før hovudkonserten spela Jorun nokre solonummer. Tor Høstmark hadde laga kvitter-kviss, Sylte-Malme-folka stilte med kaker og kaffi, og til slutt spela ei gruppe frå Romsdal Spelemannslag til dans. Programleiar Øyvind Fenne frå Romsdal Mållag hadde full kontroll på alt.

Oppdatert 27.4.15

Førehandsomtale her i Bygdaliv

Søndag 19. april kl. 19 blir det konsert på Vonheim, bygdahuset i Malmefjorden. Av programmet:

• Solokonsert med Jorun Marie Kvernberg
• Fuglesongquiz m/premie og kaffi/te attåt
• Majorstuen med KVITRE - FYKANDE FERSK!

Sjå elles denne plakaten og presentasjonen i Facebook. Arrangør er Romsdal Mållag. Det ryktast at det blir dans etter konserten.

Majorstuen

Gruppa Majorstuen har eksistert i 15 år. Her fortel dei historia si:

«Majorstuen er eit norsk folkemusikkensemble etablert i år 2000. Bandet består av fem folkemusikarar som har fele som hovudinstrument. Somme trakterer også cello, bratsj, kontrabass og oktavfele.

Majorstuen har bana veg for folkemusikken og vore stilskaparar og pionerar på den norske folkemusikkscena gjennom sine femten år. Dei har tidlegare gitt ut fem album, og vann Spellemannprisen for sitt første. Dei fire neste vart gjeve ut på deira eige plateselskap, Majorstuen Fiddlers Company. Plata Juledrøm fekk journalistane til å trille femmarar og seksarar, og fekk også ein Spellemannominasjon (2006). Ensemblet vart kåra til Årets folkemusikere 2005 av Rikskonsertene, som dei aller første vinnarane av konkurransen IntroFolk. Samme år fekk dei Hilmar Alexandersens Musikkpris.

Majorstuen har hatt fleire hundre konsertar, for ung og gamal, i inn- og utland, mellom anna Kanada, Aserbajdsjan, Israel, Frankrike, Slovenia, England, Irland, Skottland, Tsjekkia, Mexico, Danmark, Sverige og Kviterussland.»

Desse er med i Majorstuen denne gongen:

• Jorun Marie Kvernberg frå Fræna - fele
• Andreas Skeie Ljones frå Fåberg - fele og bratsj
• Synnøve S. Bjørset frå Jølster - fele
• Anders Löfberg frå Småland i Sverige - fele, cello og kontrabass
• Tove Hagen frå Rendalen - fele, bratsj og cello

Andreas Ljones har laga korte, illustrerande animasjonsfilmar som går på lerret under konserten.

KVITRE

KVITRE er namnet på den nyaste plata og konsertturnéen som kjem hit. Her er det gruppa skriv sjølv:

«I KVITRE flyg Majorstuen høgt og lågt med feler og bogar, og det er fuglesongen og fuglane sitt vesen som har inspirert ensemblet til å lage eit heilt verk av fargerike fuglekomposisjonar.

Den melankolske svanesongen, perkusjonisten hakkespetten, dei rampete ravnane, parringsdansen til uglepapegøyen kakapo - nokon er høgst levande, andre er stein daude, og kanskje blir det ditt første møte med nikkersfuglen?

Majorstuen har sidan starten i 2000 vunne eit stadig nytt og større publikum på si musikalske ferd. Gjennom å utfordre seg sjølve og korleis folkemusikken kan presenterast på ei scene har funne si heilt eiga nisje der dei leverer ei musikalsk oppleving som både inspirerer, overraskar og rører. Stryk, klimpr, kakk. Frå ellevillt tempo til manande ro. Spennet er stort, og spenninga stor!

KVITRE var tingingsverket til Førdefestivalen i 2013, og med den rykande ferske plata "KVITRE" i kofferten lanserer Majorstuen sitt sjette album.»

Oppdatert her i Bygdaliv 18.4.15

---

Fylkeskappleik i Tresfjord

Berre to frå BUL våga seg til Tresfjord på fylkeskappleik helga 11.-12.april. Marit H og Torill fekk med seg nokre av klassane laurdag ettermiddag og kveld, og kosa seg med å danse til seks ulike spelmannslag utover kvelden. Ingen store overraskingar, men alltid triveleg å høyre god musikk og sjå god dans.

Anna Gjendem og Stein Oskar Smogeli blei beste dansepar. Britt Elise Skram vann fele klasse A og fekk den beste poengsummen på kappleiken. Dåm og Drag var ikkje berre flinke arrangørar, dei vann også den største klassen, dansespel for lag med komp.

Nytt for kappleikpublikumet var ei innlagt tevling i reinlender, - mange par var med, men alle frå arrangørlaget. Elin og Stein Oskar frå Dåm og Drag vann. Men her var det mange frå BUL som kunne ha vore med, - dei ville ha gjort det svært bra.